*લોકસભા સામાન્ય ચૂંટણી-૨૦૨૪*
સુરેન્દ્રનગર જિલ્લામાં મમતા દિવસ નિમિત્તે દરેક આંગણવાડી કેન્દ્રો ખાતે સામુહિક મહેંદી દ્વારા મતદાન જાગૃતિ કાર્યક્રમ યોજાયો.
સુરેન્દ્રનગર જિલ્લામાં લોકસભા સામાન્ય ચૂંટણીનું મતદાન તા. ૦૭ મી મેના રોજ યોજાનાર છે ત્યારે મહિલા મતદાનની ટકાવારીમાં વધારો કરવા માટે ચૂંટણી તંત્ર દ્વારા શેરી મીટીંગ, ચુનાવ પાઠશાળા, ખાટલા પરિષદ તેમજ નાટકો દ્વારા પ્રેરણાત્મક સઘન પ્રયાસો કરવામાં આવી રહ્યા છે. જેની શૃંખલા રૂપે આજ રોજ સુરેન્દ્રનગર જિલ્લામાં સમાવિષ્ટ ૬૦ - દસાડા, ૬૧ - લીંબડી, ૬૨ - વઢવાણ ૬૩ - ચોટીલા ૬૪ - ધાંગધ્રા એમ પાંચેય વિધાનસભા મત વિભાગમાં આવેલી આંગણવાડીઓ ખાતે સામૂહિક મહેંદી કાર્યક્રમનું આયોજન કરવામાં આવ્યું હતું. જેમાં મમતા દિવસ નિમિત્તે જુદા જુદા સ્થળોએ સામૂહિક રીતે એક સરખો મહેંદી કાર્યક્રમ આંગણવાડીના આશા વર્કર બહેનો દ્વારા કરવામાં આવ્યો હતો અને મતદાન માટે પ્રોત્સાહક સંદેશ દર્શાવતી મેહંદી મૂકવામાં આવી હતી. તેમજ ૬૨-વઢવાણ વિધાનસભા ખાતે આંગણવાડી કાર્યકરોની સાથે સાથે મૈત્રી વિદ્યાપીઠની વિદ્યાર્થિનીઓ દ્વારા પણ કલાત્મક મહેંદી દ્વારા મતદાર જાગૃતિ સંદેશ પાઠવવામાં આવ્યો હતો.
મતદાન જાગૃત્તિ માટે 'સહ પરિવાર મતદાન એ જ લોકશાહીની શાન', 'મત સે મત ભાગો', 'મારો મત મારું ભવિષ્ય', '9૭ મે મતદાન જરૂર કરીએ', 'વોટ ફોર સ્યોર', 'ગેટ રેડી ફોર વોટ', ‘વકત સે પહલે વોટ ’, ‘૭ મે મતદાન દિવસ સહિતના જુદા જુદા સૂત્રોની કલાત્મક મહેંદી મૂકી હતી. મતદારો પોતે પણ મતદાન કરે અને અન્યને પણ લોકશાહીના આ પર્વમાં સહભાગી થવા પ્રેરણા આપે એવી અપીલ સાથે ઉપસ્થિત સર્વ મહીલાઓ, કિશોરીઓ, વિદ્યાર્થીનીઓએ 'અવશ્ય મતદાન'નાં શપથ લીધા હતા. આ કાર્યક્રમમાં મોટી સંખ્યામાં મહિલાઓ અને કિશોરીઓ જોડાઈ હતી.
