*સુરેન્દ્રનગર જિલ્લામાં બાળકોના સર્વાંગી વિકાસ માટે આયોજિત ‘નિઃશુલ્ક યોગ સમર કેમ્પ’ સંપન્ન*
સુરેન્દ્રનગર જિલ્લામાં ગુજરાત રાજ્ય યોગ બોર્ડ દ્વારા બાળકોના સર્વાંગી વિકાસ માટે તા.૨૦/૦૫/૨૦૨૪ થી તા.૨૯/૦૫/૨૦૨૪ સુધી નિઃશુલ્ક યોગ સમર કેમ્પનું આયોજન કરવામાં આવ્યું હતું. જેમાં જિલ્લાના શહેરી વિસ્તારોમાં (૧) આઈ.પી.એસ. સ્કુલ, ૮૦ ફૂટ રોડ (૨) સનશાઈન સ્કુલ, નવો ૬૦ ફૂટ રોડ (૩) વિવેકાનંદ સ્કુલ, ભક્તિનંદન સર્કલ પાસે (૪) ડાયમંડ જયુબિલી સ્કુલ, શ્રવણ ટોકીઝ પાસે અને તાલુકા વિસ્તારમાં (૫) ધ્રાંગધ્રા આર્ય સમાજ મંદિર (૬) લખતર એ.વી.ઓઝા સ્કુલ (૭)લીંબડી સ્પોર્ટસ કોમ્પલેક્ષ (૮) સાયલા શખપર પ્રાથમિક શાળા એમ અલગ-અલગ ૮ જેટલાં સ્થળોએ યોગ સમર કેમ્પ યોજાયો હતો.
આ કેમ્પમાં ૭ થી ૧૫ વર્ષના ૧૦૦૦ થી વધુ બાળકો જોડાયા હતા. આ કેમ્પમાં ગીતાજીના શ્લોક, વૈદિક યજ્ઞ, મંત્રના ઉચ્ચારણથી શરૂ કરી ઊંચાઈ વધારતા, પાચન તંત્ર મજબૂત બનાવતા, યાદશક્તિ વધારતા આસન તેમજ પ્રાણાયામ કર્યા બાદ યાદશક્તિ અને એકાગ્રતા વધારતી વિવિધ રમતો બાળકોને શીખવવામાં આવી હતી. દેશની ભાવિ પેઢી એવા આ બાળકોમાં સમુહ ભાવના, વડીલો પ્રત્યે આદર ભાવ વિકસે તેમજ દેશના જવાબદાર અને આદર્શ નાગરિક બની રહે તે માટે જરૂરી બાબતો સૂચવવામાં આવી હતી.
યોગ- ધ્યાન- પ્રાણાયામ સાથે બાળકો તંદુરસ્ત રહેવા માટે પૌષ્ટિક ખાનપાનની આદતો કેળવે તે માટે રોજ પૌષ્ટિક નાસ્તો પણ આપવામાં આવતો હતો. બાળકોને નિયમિત યોગાભ્યાસ કરવાથી થતા ફાયદા અંગે સમજણ આપી સમર કેમ્પ બાદ પણ યોગને જીવનશૈલીનો ભાગ બનાવી યોગાભ્યાસ ચાલુ રાખી શકે તે માટે ટોપી, ટી શર્ટ તેમજ સચિત્ર બે યોગ પુસ્તિકા પણ આપવામાં આવી હતી, તેમ યોગ કોર્ડીનેટરશ્રી નીતા દેસાઈની યાદીમાં જણાવાયું છે.
૦૦૦૦૦
